Barong Tagalong

Kung wariin ko sa ngayon ay muling nagbabalik
Ang barong Tagalog na sadyang makisig.
Mahaba-habang panahon nawaglit sa ating isip
Na ito’y damit ng bansang kay hirap malupig.
Ang barong ito ay tatak Pilipinong talaga
Dapat nating mahalin sa tuwi-tuwina.

Sa sariling bayan nati’y alinsangan
Makapal na kayoy hindi kailangan.
Ang barong Tagalog kahit sinamay lang
Ginhawang gamitin sa lahat ng pagdiriwang.

Nang maghimagsik itong ating bansa
Dahil sa paglaya
Ang barong Tagalog natin ay dakila
Pagka’t siyang ginamit
Ng bayaning namayapa.

Banahaw

Ang huni ng ibon, aliw-iw ng batis
Sa bundok Banahaw
Ay inihahatid, ay inihahatid
Nang hanging amihan
Kaya’t yaring abang puso
Sakbibi nang madlang lumbay
Sa sandaling ito, sa sandaling ito’y
Naliligayahan.

Halina, irog ko at tayo’y magsayaw
Sa kumpas ng tugtog, tayo ay sumabay
Dini naman sa lumang kudyapi
Ikaw irog aking aawitan
Sa saliw ng hanging palay-palay
Sa bundok ng Banahaw.

Ay, Ay, Ay, O, Pagibig

Buhat nang kita’y makita
Nadama ang pagsinta
Ng puso kong nagdurusa
Giliw ko, maawa ka.

Huwag mo sanang pahirapan
Puso kong nagdaramdam
Pagka’t magpakailan man
Ikaw ang tunay kong mahal.

Ay, ay, ay, ay O pagibig
Pagpumasok sa puso ay may ligalig
Ay, ay, ay, ay, ay hanggang langit
Ang pangako ng pusong umiibig

Ano Daw Idtong Sa Gogon

Ano daw idtong sa gogon
Garong bulawan paghilngon
Casu sacuyang dulucon
Ay, ay burac palan nin balagon.

Casu sacuya ng qui cu-a
Sarong tingog ang nagsayuma
Hariman aco pagcua-a
Ay, ay burac aco ni Maria.

Alaala Kita Sa Pagtulog

Akala mo yata kita’y nililimot
Alaala kita sa gabing pagtulog
Ang inuunan ko luhang umaagos
Ang binabanig ko ay sama ng loob.

Di ka na nahabag, di ka na naawa.
Lusak na ang lupa sa patak ng luha.

Buksan mo na neneng ang munting bintana
At ako’y dungawin nagmamakaawa.

Ako’y Kampupot

Ako’y kampupot
Na bagong sikat
Ang halimuyak
Sadyang laganap
Kaligayahan sa bawa’t oras
Man din ang nais
Tanging paglingap

Kaya’t noong minsan
Ay napakinggan
Isang binatang
Nananambitan
Puso kong taglay
Lubhang pihikan
Ay narahuyo sa panawagan.

Refrain:

Nasaan yung pangarap
Ng paglalambingan
Tangan na ng aking hirang
Alay ay kaligayahan
Kay tamis nga naman
Mabuhay ‘ta sa pagmamahal
Kung ang ligaya ay makakamtam
Sa habang buhay.

Ako Ay Pilipino

Ako ay Pilipino
Ang dugo’y maharlika
Likas sa aking puso
Adhikaing kay ganda
Sa Pilipinas na aking bayan
Lantay na Perlas ng Silanganan
Wari’y natipon ang kayamanan
ng Maykapal

Bigay sa ‘king talino
Sa mabuti lang laan
Sa aki’y katutubo
Ang maging mapagmahal

Ako ay Pilipino, ako ay Pilipino
Isang bansa, ‘sang diwa
ang minimithi ko
Sa bayan ko’t bandila
Laan buhay ko’t diwa
Ako ay Pilipino
Pilipinong totoo
Ako ay Pilipino, ako ay Pilipino
Taas noo kahit kanino
Ang Pilipino ay ako.

Ako ay Pilipino, ako ay Pilipino
Taas noo kahit kanino
Ang Pilipino ay ako.